Kitab Mugadas
Kitab Mugadas (hurup Arab Gundul: كتاب مقدس) atawa Alkitab (hurup Arab Gundul: الكتاب) atawa Bèbel (hurup Arab Gundul: بيبل; deri basa Welanda Bijbel, deri basa Yunani Lumbrah τὰ βιβλία tà biblía 'kitab-kitab') entu atu gabregan naskah-naskah atawa suhup-suhup agama nyang dianggep suci dalem ajaran Serani, Yahudi, Samiriah, Selam, èn laèn-laèn igama. Kitab Mugadas entu atu bunga rampé deri macem-macem ragem, nyang aslinya ditulis dalem basa Ibrani, Aram, èn Yunani Lumbrah. Ni kitab isinya taturan, riwayat, sair, nubuat, serènta laèn-laèn jandrah. Gabregan nyang diterima sebagé bagèan deri Kitab Mugadas ama atu terdisi igama atawa kuminitèt digeronya kanun kitab atawa kanun Bèbel. Orang-orang nyang percaya ama Kitab Mugadas ngimanin kalo entu bikinan wahyu ilahi, cuman laèn aja dah tu cara mahamin ama napsirinnya.
