Asia Kidul-wètan

Asia Kidul-wètan (hurup Arap Gundul: اسيا كيدول-ويتن) entu salah atu bagèan deri benua Asia, nyang nglingkup negara di belah kidulnya Cina, belah kulonnya Papua Nugini, belah lornya Ostrali, ama belah wètannya Negeri Hindi. Ni daèrah letaknya di wilayah papagan lèmpèng-lèmpèng bumi, ya'entu lèmpèng Èurasia ama Indo-Ostrali. Mangkanya, ni benua sering kena lindu èn gableg gunung api setumbra.

Lokasi Asia Kidul-Wètan di dunia

Peta Asia Kidul-Wètan

Asia Kidul-wètan kena dibagi jadi dua bagèan, ya'entu Asia Kidul-wètan Daratan (basa Inggris: Mainland Southeast Asia) nyang ngeliputin Birma, Muang-Tay, Laos, Kemboja, Piètnam, ama Semenanjung Malaya (Malésia Kulon). Nah, kalo Asia Kidul-Wètan Pulo (basa Inggris: Maritime Southeast Asia) entu ngeliputin Indonésia, Singapur, Malésia Wètan (Sabah èn Serawak), Bruné Darussalam, Pilipénen, Timor Wètan, ama Pulo Natal.

Luasnya ni wilayah kira-kira 4,500,000 km², atawa sama ama 3% luasnya daratan bumi, sedeng penduduknya banyaknya kira-kira 610,000,000 atawa 8,8% jumblah penduduknya bumi, dengen dia punya kepadetan 135.6 orang/km². Agama nyang paling banyak dianut entu Islam ama Buddha. Selaèn entu, ada juga' Krèsten. Bagèn begitu, banyak juga' laèn-laèn agama nyang dianut ama masarakatnya, misalnya agama Hindu ama kepercayaan asli setempat.

Daptar negara

Ada 11 negara nyang masup wilayah Asia Kidul-wètan:

1. Birma, sintremnya Naypyidaw
2. Bruné Darussalam, sintremnya Bandar Seri Begawan
3. Indonésia, sintremnya Jakarta
4. Kemboja, sintremnya Phnom Penh
5. Laos, sintremnya Wiang Cendana
6. Malésia, sintremnya Kuala Lumpur
7. Muang-Tay, sintremnya Bangkok
8. Piètnam, sintrem Hanoi
9. Pilipénen, sintremnya Manila
10. Singapur, sintremnya Singapur
11. Timor Wètan, sintremnya Dili