Benua Kutub Kidul
Benua Kutub Kidul (hurup Arab Gundul: بنوا قطب کيدول, Indonésia: Antarktika; Inggris: Antarctica) ya'entu benua nyang letaknya entu di Bumi punya bekidul. Kalo longok benua Kutub Kidul entu semua-muanya ada di lingkeran Kutub Kidul (66,3° Lintang Kidul), diiterin ama atu laotan nyang dingin sekali ya'entu laotan Kutub Kidul. Kalo dilongok deri luasnya nyang 14 juta km2, benua Kutub Kidul jadi nyang kelima paling luas abis Èurasia, Aprika, Amrik Lor, èn Amrik Kidul. Seumpa dibandingin, benua Kutub Kidul entu hampir ada dua kalinya benua Ostrali. Benua Kutub Kidul pepes[1] ditutupin ès. Enni ès nutupin hampir semua tanahnya ampé Semenanjung Kutub Kidul.
Benua Kutub Kidul entu benua paling kering di Bumi. Èmang enni benua dingin sekali saban taon, cuman enni benua jarang banget turun ujan, lantaran ujannya aja cuman 200 mm (8 inci) di pinggiran panténya, kalo ke daleman lagi malahan lebih jarang lagi. Saban taon suhu di benua Kutub Kidul entu bisa ampé -89°C. Orang nyang duduk di sini rata-rata cuman peneliti ama cendekiawan ajè, enni bikin enni benua sepi kaga ada orang, ga ada 5000 orang nyang duduk di sini. Cuman makhluk nyang bisa idup èn tahan dingin kaya' jamur, ganggang, kuman, protosoa, taneman. Kalo héwan palingan cuman pingwin, nématoda, anjing laot. Legènda soal atu tanah di bekidul (Terra Australis) sudah ngiclo sederi jaman baheula. Enni benua awalnya ditemuan èn diterima halayak entu taon 1820 èn orang nginjek tanahnya pertama kali entu taon 1821. Cuman, péta nyang dikeja ama Piri Reis taon 1513 nyang ada benua Kidulnya entu digadang-gadang sebagé panté benua Kutub Kidul.
Benua Kutub Kidul entu kawasan bébas. Cuman ada berapa negeri nyang ngetèp tanah di enni benua sebagé haknya dia.
Ruju'an
permak- ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Pepes (hurup Arab Gundul: ففس) – terus-terusan (Indo.); continuously (Ing.).