Gambar cèmèn
Gambar cèmèn (hurup Arab Gundul: ݢمبر چيمن) atawa cèmèn[1] (hurup Arab Gundul: چيمن) entu atu jenis seni rupa delengan (visual) nyang biasanya digambar, sering dikeja pèlem, dalem setil nyang kaga' réalistik atawa separo-réalistik. Dalem laèn-laèn biasa, cèmèn galib digero' sebagé kartun (Itali: cartone; Welanda: karton 'karton'). Arti sebenernya udah berobah, walakin di pemakéan modèren biasanya ngruju' apa ke gambar atawa rèndèngan gambar nyang dimaksudin bakal nyindir atawa nggebos (satire), karikatur, atawa bodoran, atawa ke gambar gerak nyang begantung ama rèntètan gambar bakal penggerakannya (animation). Orang nyang ngeja gambar cèmèn biasanya digero kartunis 'tukang gambar cèmèn'.
Cèmèn punya konsèp asalnya semprakan Jaman Pertengahan, èn pertama kali digero sebagé penyiapan gambar bakal ponggahan seni, kaya' nglukis, gambar tèmbok, déwangga (sejenis sulaman), atawa jendèla kaca warna. Terus, ni cèmèn juga' dipaké bakal maksud pulitis ama komik setrip. Pas wasilahnya udah mingkin ngembang, di awal-awal abad ke-20, cèmèn mulain ngruju' ke pèlem gerak nyang medu kaya cèmèn citak.[2]
Ruju'an
permak- ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Di ni kamus, sebenernya cuman ditulis cèmèn doang nyang dita'rip sebagé kartun, cuman di mari ditambain 'gambar' biar kaga' nyaru ama 'pèlem cèmèn'.
- ↑ Becker, Stephen D.; Goldberg, Rube (1959). Comic Art in America: A Social History of the Funnies, the Political Cartoons, Magazine Humor, Sporting Cartoons, and Animated Cartoons. Simon & Schuster.