Haji (bulan)

Haji (hurup Arab Gundul: حج) atawa Rayagung (hurup Arab Gundul: راياݢوڠ) ada bulan keduabelas di almenak Selam atawa Hijriah. Di basa Arap, ni bulan namanya – Żu 'l-ḥijjah (Arab: ذو الحجّة) nyang lèterleknya – 'empunya haji'. Di Betawi, kita lebi akrab bilangnya 'bulan Haji', jarang nyang maké 'Julhijah'.

Terdisi

Sebab di ni bulan ada ibadah orang-orang Selam deri mana-mana negara punya kerjain, ya'entu ibadah haji, ni bulan digeronya 'bulan Haji'. Orang-orang nyang pada berangkat haji ke Mekah udah barang tentu pasti ngeliwatin tanggal-tanggal penting, di antaranya: Wukup Arapah (9 Haji) ama Lebaran Haji (10 Haji).

Adapun orang-orang nyang kaga' pegi haji, orang-orang Selam disarèatin bakal ngelakonin ibadah korban di ari lebaran nyang namanya ʿĪd al-aḍḥā (basa Arap: عيد الأضحى) 'lebaran korban' atawa ʿĪd al-kabīr (basa Arap: عيد الكبير) 'lebaran korban', atawa kalo orang Betawi kata mah, Lebaran Haji (hurup Arap Gundul: لبارن حج) atawa Lebaran Korban (hurup Arap Gundul: لبارن قربان) atawa Idulkorban (hurup Arap Gundul: عيد القربان) atawa Lebaran Kambing (hurup Arap Gundul: لبارن كمبڠ). Di ni ari, abisnya sembahyang Lebaran Haji, orang-orang pada nyembelèh héwan korban nyang antara laèn: kambing, sampi, kebo, èns. Entar, tu daging biasanya diangsrong-angsrongin bakal nyang ada hak (nyang korban) ama orang-orang nyang kaga' gablek. Penyembelèhannya mah kaga' cuman di entu ari doang, tapi juga' di tiga ari abisnya (11, 12, 13 Haji), nyang kita bilang mah Ari Tesrik (hurup Arap Gundul: هارى تشريق; basa Arap: يوم التشريق yaum al-tasyrīq).