Imlèk

Imlèk (hurup Arab Gundul: ايملك; hurup Tionghoa Ringkes: 阴历, hurup Tionghoa Terdisionil: 陰曆; Hokkièn: im-le̍k 'penanggalan bulan') ya'entu almenak Tionghoa nyang dikeja deri penggabregan almenak bulan èn almenak matahari. Dalem penanggalan Imlèk, saban taon ada bebinatang nyang jadi perlambangan (atawa sio) nyang jumblahnya ada 12; ya'entu: tikus, kebo, macan, keninci, liong, ula, kuda, kambing, kunyuk, ayam, anjing, ama cèlèng. Serènta jat-jat yang ngiringin tuh binatang, nyang ada kayu, api, tana, logam, ama aèr. Jadi umpama kata, ini taon sionya kunyuk, terus jatnya api, jadi jatohnya ni taon ada taon kunyuk api.

Ari-ari gedé dalem Imlèk

Tanggal	Nama	Nama Hokkien	Penegesan
bulan 1 ari 1	Lebaran Cina, Sincia' atawa Tjia Gwee Tje It	春節	Ngumpul bareng sanak pamili èn andé-tolan selama 3 ampe 15 ari.
bulan 1 ari 15	Cap Go Mèh	元宵節	Ngarakin tepèkong kuliling kota, ama makan lontong cap go mèh.
4 atawa 5 April	Cèngbèng	清明節	Benain bong; ngorèd, nyekar, ama ngancakin bong uyut-kumpi.
bulan 5 ari 5	Pèh Cun atawa Pècun	端午節	Lomba perau liong, lèmpar bacang, ama nangkep bèbèk di kali.