Jem Inggris
Jem Inggris (hurup Arab Gundul: جم إڠݢريس; Inggris: Big Ben) entu nama poyokan bakal kelenèngan nyang gondal-gandul di menara jem nyang ada di blèlirnya Ruma Mejelis Bicara, Londen, Inggris. Resminya mah, ni menara digero'nya Menara Élisabèt. Tadénya, ni menara cuman dibilang Menara Jem, cuman dibalik nama dah tu pas bulan Sèptèmber 2012 buat ngerayain Gocap Tahon Intennya Ratu Élisabèt II. Cumanan mah, orang, masup juga' orang nyang pada ngambrek di Londen, pada nggero'nya Big Ben anu tumannya begitu, kon, bahnanya èmang segedé alaihim.
Ni menara dirancang ama Edmund Beckett Denison ama makan wayah ampé 13 tahon punya lama cuman bakal ngebangun ni menara nyang marinya rampung selamanya tahon 1859. Tu jem pepes nyala dah semparakan entu tahon, kecuali berapa bulanan doang pas tahon 1976 nyang tu jem ngadat ampé kudu didandanin dulu.