Wikipédi

Kamar Belakang

Kamar-Belakang (hurup Arab Gundul: کمربلاکڠ) atawa nyang mashur disebut sebagé The Backrooms (hurup Arab Gundul: دباكرومز) entu atu tahayul nyang katanya Kamar Belakang entu jalanan muter-muter[1] nyang ada bau kapret èn tèmbok warna kuning satu warna, serènta lampu nèon nyang cenging kenceng pisan. Walopun pemaké anterjala[2] udah ngembangin enni konsèp dengen ngeja "trap[3]" nyang béda-béda deri Kamar Belakang, pèrsi nyang asli deri tanggepan 4chan dua paragrap di kiriman "gambar nyang ngerisihin", di mana ada sorang pemaké nyang ngeja kisah deri atu potrètnya. Kamar Belakang dibanding-bandingin ama banyak trèn èn média serem laènnya, masup juga Kamar Barjah[4], gabungan Yayasan SCP, èn séri album nyang lamanya enam jem Everywhere at the End of Time.

Penggambaran Kamar Belakang

Sederi pengejaan aslinya, Kamar Belakang uda dikembangin jadi macem-macem wujud média èn budaya anterjala laènnya, masup juga gim betontonan èn tontonan[5] YouTube.

Asal-muasal èn penggambaran

permak

Kamar Belakang asal-muasalnya deri untelan[6] nyang dikirim di /x/ board 4chan tanggal 12 Mèi 2019. Pas entu wayah, sorang pemaké sondernama[7] mènta orang laèn bakal "kirimin gambar nyang ngeja risih setenga mati." Potrèt awal Kamar Belakang diangkat ngasihliatin orang-orang ama gambat nyang aga' doyong deri lorong warna kuning. Pemaké sondernama laèn nanggepin entu potrèt paké kisah awal Kamar Belakang. Entu pemaké ngaku kalo sorang bakal masup ke Kamar Belakang pas dia "kuar-kuar paké tembus bayang[8] nyang ujug-ujug di tempat jin buang anak." Enni noclip maksudnya entu setilah maèn gim pas sorang pemaèn ngeliwatin watesannya nyang kudunya ngaling-ngaling dia (kaya' tèmbok atawa tempat perboden).

Abis entu kiriman 4chan jadi kesohor, berapa pemaké anterjala nulisin kisah serem nyang ada juntrungannya ama Kamar Belakang. Sebagé lagi, banyak mémé nyang dikeja èn diduman-duman di média sosial nyang ngeja entu tahayul makin bekèn. Berapa orang juga bilang kalo dia pada udah deleng entu gambar di atu tempat sebelonnya; ngèkor Maning Patston deri Happy Mag punya pikir, entu tanggepan entu "kemawjudan, kekopongan, èn ketakutan." Patston juga kasih tanggepan pemakéan setilah "tembus bayang", napsirin sebagé "penyakit di mana tèmbok nyata dirubuhin", kaya kemawjudan "korin[9]". Bandingin tempat nyang rupa trap deri Resident Evil, Kaitlyn Kubrick deri Somag News nyang nyebutin Kamar Belakang "tahayul serem deri mimpi nyang kela'nat[10]."

Tempat entu Kamar Belakang punya potrèt nyang aslinya kaga' tauannya, walo ada tempat nyang udah diusulin. Enni tahayul juga udah dijuntrungin ama konsèp kenopsia, ya'entu "hawa nyeremin èn sedi deri tempat nyang lajimnya ramé ama orang-orang cumanan wayah gini udah kosong melompong".

Pemontenan

permak
 
Kemashuran Kamar Belakang bikin meloporin trèn anterjala Kamar Barjah: "potrèt ruangan nyang serem èn kosong melompong", kaya' enni lorong nyang kaga' ujungnya.

Kamar Belakang sigrah mingkin bekèn lantaran para mualip[11] èn pemaké anterjala ngasih tanggepan soal keganjilannya. Enni tahayul juga udah disebut-sebut sebagé asal-muasal atawa tulad nyang paling bekèn deri trèn anterjala Kamar Barjah dengen potrèt nyang ngeja "rasa napaktilas, keilangan, èn ketrapastian"; tenger #liminalspaces udah nyentuh hampir 100 jutaan tontonan di média sosial TikTok. Wayah sorang wadon namanya Claire Scheulin nemuin mol nyang udah apkir[12], wargajala[13] bandingin entu tempat punya potrèt ama penggambaran Kamar Belakang nyang asli.

Kamar Belakang punya aspèk serem dibandingin ama téori patgulipat/kongkalikong piring terbang di Gutekan 51, dengen bikinan pengeja pèlem Stanley Kubrick The Shining, tahayul Minecraft Herobrine, èn pèlem 2019 Us. Enni kamar nyarunya ada punya kemiripan ama kisah serem Yayasan SCO èn gedung vague deri Control (2019). Dazed bilang kalo Kamar Belakang entu tulad deri "kisah wargajala".

Kemashuran

permak

Pèlem

permak

Tanggal 7 Januari 2022 ada atu pèlem serem pèndèk nyang judulnya The Backrooms (Found Footage) nyang diangkat ke umrup YouTube dengen tukang ngarahin pèlem[14] nyang usiannya 16 taon pas entu wayah nyang nama Kane Parsons (Kane Pixels di YouTube). Dikasiliatin sebagé rakaman taon 1996 soal sorang tukang nyènter[15] nyang masi boca kaga' sengaja masup ke entu tempat, terus ngibrit deri makhluk-makhluk, èn mèrad ke trap nyang laèn. Enni pèlem maké cuplikan langsung èn pembikinan Blender 3D, serènta tèhnik laèn bakal ngeja tontonan kaya' tustèl berasa goyang-goyang èn saringan VHS. Dikelompokin ama berapa orang sebagé "analoh serem", pengakuan ringkesnya diterima ama WPST, penimbrung Erica Russell nyebutinnya si "tontonan paling nyeremin di anterjala", melèngken si Mary Beth McAndrews deri Dread Central bandinginnya ama gim betontonan 2019 Control èn "nontoninnya 10 kali".

Berapa orang kagèt ama nyang dilakonin ama Parsons ama apa nyang digablekinnya: Jai Alexis deri pelampang PopHorror kagèt ama umur tukang ngarahin pèlemnya, melèngken The Awesomer nyeratin kalo Backrooms "Ngasih unjuk cara ngeja ketegangan sonderbéa[16]". Rob Beschizza deri Boing Boing ada punya hipotèsa kalo entu tahayul akhirnya bakal "beakhir di dalam pèlem Hollywood 2 jem nyang bagus cuman surem", nyamain enni ancer-ancer ama tahayul setan jangkung èn pèlemnya taon 2018. Pas ngejelasin mémé deri Kamar Belakang, Tanner Fox deri GamesRant nyebut entu pèlem pèndèk "tontonan nyang ngeja lumpuh nyang ngepakin[17] anceman ke dalem waktu gawénya nyang sebentar."

Parsons juga udah ngangkat tujuh tontonan laèn nyang ada juntrungannya ama Kamar Belakang dalem rangkéan nonkrologis tanggal 8 Juli 2023: pengujian ketiga, kontak awal, orang-orang nyang ilang, tontonan impormasi, laporan otopsi, gerak keendus, bentuk kolot[18], jebakan, èn Raporan. Dia pada ngiter-ngiter di kiteran Yayasan Async bikin-bikinan[19] nyang berusaha ampé dengen tontonan impormasi nyang menjuntrung ke tempat sebagé proyèk KV31. Ada juga dua tontonan Kamar Belakang trada umum nyang diangkat ama Kane, salah atunya ngejuntrung ke lindu Loma Prieta taon 1989.

Gim

permak
 
Tukang Senyum, atu deri banyak makhluk nyang bisa dipapagin di Kamar Belakang. Enni makhluk sering banget nongtot di gim-gim Kamar Belakang.

Tanggal 12 Pèbuari 2022, sorang pemaké Reddir majang péta Minecraft nyang ngedasarin konsèp Kamar Belakang. Mulain tanggal 8 Juli 2023, mod masih dalem pengembangan, dengen Thomas McNulty deri Screen Rant ngaku kalo "makhluk" bakal ada juga di entu péta.

Kamar Belakang juga udah jadi dasar bakal gim sétan dengen nama The Backrooms Game nyang dilangsir taon 2019 ama studio mandiri[20] Pie on a Plate Productions. Dipuji lantaran keseremannya, dengen mualip Bloody Disgusting, Michael L. Sandal bandingin dengen bikinan mualip Charlotte Perkins Gilman. Mualip Sigma Klim deri Guru Gamer ngerasanin kalo enni gim entu atu nyang laèn kendiri.

Gim laèn nyang dilangsir dengen juntrungan Kamar Belakang kaya' The Backrooms Simulator dilangsir taon 2019 èn Enter the Backrooms dilangsir taon 2021.

Ruju'an

permak
  1. ↑ Jalanan muter-muter (hurup Arab Gundul: جالنن موتر٢) - (Ind.) Labirin; (Ing.) Maze.
  2. ↑ Anterjala (hurup Arab Gundul: انترجال) - (Ind./Ing.) Internet.
  3. ↑ Trap (hurup Arab Gundul: ترف) - (Ind./Ing.) Level.
  4. ↑ Kamar Barjah (hurup Arab Gundul: کمر برزخ) - (Ind.) Ruang Liminal; (Ing.) Liminal Space.
  5. ↑ Tontonan (hurup Arab Gundul: تونتونن) - (Ind./Ing.) Video.
  6. ↑ Untelan (hurup Arab Gundul: اونتلن) - (Ind.) Utas; (Ing.) Thread.
  7. ↑ Sondernama (hurup Arab Gundul: سوندرنام) - (Ind.) Anonim; (Ing.) Anonymous.
  8. ↑ Tembus bayang (hurup Arab Gundul: تمبوس بايڠ) - (Ind.) Noklip; (Ing.) Noclip.
  9. ↑ Korin (hurup Arab Gundul: قرين) - (Dèt.) Doppelgänger.
  10. ↑ Kela'nat (hurup Arab Gundul: کلعنة) - (Ind.) Terkutuk; (Ing.) Cursed.
  11. ↑ Mualip (hurup Arab Gundul: مؤلف) - (Ind.) Penulis; (Ing.) Author.
  12. ↑ Apkir (hurup Arab Gundul: افکير) - (Ind.) Terbengkalai; (Ing.) Abandoned.
  13. ↑ Wargajala (hurup Arab Gundul: وارݢجال) - (Ind.) Warganet; (Ing.) Netizen.
  14. ↑ Tukang ngarahin pèlem (hurup Arab Gundul: توکڠ ڠارهين فيلم) - (Ind.) Sutradara; (Ing.) Director.
  15. ↑ Tukang nyènter (hurup Arab Gundul: توکڠ ڽينتر) - (Ind.) Kameramen; (Ing.) Cameraman
  16. ↑ Sonderbéa (hurup Arab Gundul: سوندربيا) - (Ind.) Tanpa biaya; (Ing.) Costless
  17. ↑ Ngepakin (hurup Arab Gundul: ڠفکين) - (Ind.) Mengemas; (Ing.) To pack
  18. ↑ Bentuk kolot (hurup Arab Gundul: بنتق کولة) - (Ind.) Purwarupa; (Ind.) Prototype
  19. ↑ Bikin-bikinan (hurup Arab Gundul: بيکن٢ن) - (Ind.) Fiktif; (Ing.) Fictive. kin-bikinan (hurup Arab Gundu)i
  20. ↑ Studio mandiri (hurup Arab Gundul: ستوديو مندرى) - (Ind.) Studio independen; (Ing.) Independent studio.
Didapetin deri https://bew.wikipedia.org/w/index.php?title=Kamar_Belakang&oldid=22651