Palang pintu

Palang Pintu nyaitu adat perkawinan khas anak Betawi, nyang biasanye dipake pade saat menjelang acara nikahan. Tradisi Palang Pintu eni merupakan pelengkap saat penganten lelaki nyang disebut si "tuan raja mude" pengen masukin rume penganten perempuan atawa si "tuan putri". Ketike pengen masuk rume penganten perempuan, pihak penganten perempuan akan ngehadang.

Silat Betawi saat acara Palang Pintu, lagi nunjukin teknik kuncian ngelucutin golok.

Peserta nyang ikut ngeramein acara eni terbagi menjadi dua, nyang satu di pihak penganten lelaki, dan nyang satunye lagi dipihak penganten perempuan. Biasanye penganten lelaki berjalan diiringin ame alunan suare rebane menuju ke rume penganten perempuannye. Iringan rebana ketimpring juga diikutin barisan sejumlah kerabat nyang ngebawa seserahan, mulain dari roti buaye nyang ngelambangin kesetiaan, sayur-mayur, uang, jajanan khas Betawi, pakean, juge perlengkapan kamar penganten nyang berat seperti tempat tidur dan lemari juge dibawa dalam prosesi arak-arakkan. Ketike penganten lelaki dah nyampe di pekarangan rume penganten perempuan, acara Palang Pintunye bise dimulain.

Pihak penganten lelaki mulain dengan ngucapin salam, abis entu mulain deh jagoannye masing-masing pihak nunjukin kebisaannye, dimulain dari pantunnye terus dilanjutin ame silatnye, terakhir sikenye. Tempo dulu emang udeh jadi ciri tiap kampung punye jagoan silatnye masing-masing, dan seni eni nyang mau dilestriin ame adat Palang Pintu. Nah, jagoan dari kedua belah pihak ceritenye lalu begebrak saling berusahe ngejatuhin satu sama lain. Biasanye dari pihak perempuan masang dua jagoan biar pertarungannye keliatan lebih seru, tapi biar kate jagoan dari pihak lelaki cuman satu die bakalan dijage jangan sampe kalah. Soalnye acara nikahan baru bise dilanjutin pihak lelaki, syaratnye kudu ngalahin jagoan dari kubu penganten perempuan. Jadi ibarat kate, pihak lelaki bise "ngebuka" palang pintunye rume pihak perempuan.

Selese pertarungan yang dimenangin jagoan dari pihak penganten lelaki, dibacain deh lagu sike dengan alunan nyang merdu seperti pembacaan sholawat atawa orang sedang ngaji. Akhirnye penganten lelaki diijinin masuk ke rume penganten perempuan, dan acara dilanjutin.

Pranala luar

• Buka Palang Pintu, Kesenian Betawi Tempo Doeloe
• Palang Pintu.. (Perkawinan Adat Betawie), Betawi Tulen