Pedelokan

Pedelokan (hurup Arab Gundul: فدلوقن) atawa dimènsi (hurup Arab Gundul: ديمينسى) ièlah cara pegimana kita ndelok atawa ngiat, ngukur, ama ngrasanin kita punya dunia maké atas-bawah, kanan-kèbot, depan-belakang, panas-adem, ama pegimana panjang, serènta juga' mengrupaken atu gambaran pernik deri ètung-ètungan ama èlmu tabèat. Atu cara bakal na'rip pedelokan ièlah dengen ndelok ke derajat keloncèran, atawa pegimana benda kena gerak-gerak di atu tempat. Ada macem-macem gambaran atawa cara pegimana itu istilah pedelokan dipaké ama ada laèn-laèn ta'rip. Poko'nya, kaga' ada ta'rip atu nyang kena nutugin semua gambaran.

Belah paling kèbot entu atu sikak (pendelengan dua), nyang tenga – kotak (pendelengan tiga), ama nyang paling kanan – kotak sorot empat (pendelengan empat)

Istilah Betawi

Istilah pedelokan ièlah atu istilah rèkaan anyar bakal nutugin hajat modèren. Asalnya, kata delok di basa Betawi ièlah sembabadan bakal kata 'liat, longok'. Adapun tetambahan pe-an atu artinya ièlah "tempat...", tuladnya: Pejambon 'tempat pada ngejeprah jambu', Pekayon 'tempat pada ngejeprah kayu', èns. Mangka, kata pedelokan artinya 'tempat ngiat, tempat delok'. Adapun dimensi, dalem ta'ripnya, ièlah pegimana atu benda kena didelok. Misalnya, gambar dua dimensi, artinya itu gambar gableg huk tempat kita bisa delok itu gambar, nya'entu panjang × lèbar. Artinya, di mari ada dua pedelokan atawa tempat delok itu gambar, nya'entu deri huk panjang ama huk lèbar. Begitu juga' entinya bakal pedelokan-pedelokan laènnya kaé pedelokan tiga (3-D), pedelokan empat (4-D), pedelokan lima (5-D), èns.