Sétan ngèsot

Sétan ngèsot (hurup Arab Gundul: شيطان ڠيسوت) atawa téké-téké (hurup Arab Gundul: تيکي٢) ya'entu tahayul deri negeri Nipong. Enni sétan bakalan ngésot lantaran badannya cuman separo doang deri pinggal ke atas. Pas lagi pindah-pindah tempat bakalan ada suara "téké-téké", jadinya entu suara dijadiin nama deri enni sétan.

Tahayul soal sétan ngèsot

Enni tahayul katanya muncul lantaran ada atu bocah wadon nyang jadi korban kelecéan. Saban ari èn saban tempat enni bocah wadon pasti dikelecéin mulu. Enni bocah wadon namanya Kashima Reiko.

Atu ari enni Reiko lagi nungguin keréta, ada temennya atu iseng ngasih jangkrik di pundaknya. Lantaran si Reiko kagèt èn jengker liat enni jangkrik, si Reiko jatoh dia ke rèl keréta. Kaga' lama ada keréta liwat èn ngelindes badan si Reiko ampé kebelah jadi dua bagéan. Ahirnya si Reiko liwat di tempat.

Entu roh Reiko masih gentayangan dengen badannya yang kaga' lengkap. Si roh Reiko jalan cuman ngésot paké tangan èn sikutnya. Enni hal ngeja keluar bunyi "téké-téké". Lebihnya lagi, enni si roh Reiko bawa sabit ke mana-mana èn siap nebas kaki orang-orang nyang ditemuinnya.

Cara ngindarin sétan ngèsot

Satu-satunya cara ngindarin sétan ngèsot entu cuman dengen jawab pertanyaan nyang ditanyain ama entu sétan. Entu sétan bakal tanyain "Gua punya kaki di mana?", jawabannya cuman atu, ya'entu "Di jalur Meishin." Kalo kaga' jawab gitu, entu kaki bisa langsung ditebas ama entu sétan.