Sétan salju jepang

Sétan salju jepang atawa nyeng bekèn digero' Wadon salju (basa Jepang: 雪女; tuker urup Latèn: Yuki-onna) entu atu mahluk atawa youkai dalem cerita ra'yat Nipong. Dia jadi tokoh bekèn dalem sastra Nipong, gambar cèmèn, èn pèlem cèmèn. Kadang-kadang, dia juga' digero' sebagé puteri salju (Yuki-musume; urup Kanji: 雪娘)^[1], Peri Salju (yuki-onago), Sundel Salju (yukijorō),^[1] Mpo' Salju (yuki anesa), Nya' Salju (yuki-omba),^[2] Nènè' Salju (yukinba; deri Éhimé,^[2] yukifuri-baba^[1] (dari Nagano).^[2]

Tampang

Sétan salju jepang nongol pas malem-malem saljuan sebagé sosok cèwè' cakep jangkung nyeng rambutnya item èn biwirnya biru pucet. Kulitnya nyeng pucet atawa takanu tembus pandang bikin dia kaya' nyatu ama salju (kaya' nyeng nyohor diceritain dalem bukunya Koizumi Yakumo, Yuki Onna. Kadang-kadang, dia maké kimono putih,^[3] cuman laèn cerita ngegambarinnya sebagé wadon meleding èn cuma muka ama tu rambut tok nyeng keliatan banget di tengah-tengah salju.^[4] Sengkilang cakep banget tampangnya, cuma tatapannya bisa ngeja orang jadi takut. Dia ngiber di atas salju, ampé-ampé entè' pisan jejekannya (berapa cerita ada nyeng bilang kalo dia entè' sikilnya, ciri-ciri di kebanyakan sétan Nipong èn dia bisa berobah jadi ampag-ampag atawa salju kalo ngerasa keancem.

Sipat

Kalo diliat deri ceritanya, sétan salju jepang disènggèt-sènggètin ama usum salju èn badé salju, nya'entu ruh orang nyeng modar di salju.^[5] Di laèn sisi, dia kiatan cakep èn anteng, cuma bengis pas matiin orang nyeng polos ora gableg salah. Sampé abad ke-18, ampir kabèhan cerita bilangnya ni sétan salju jepang tu mahluk nyeng jahat. Dalem cerita wayah gini, sosoknya sokanan digamberin rasa keorang-orangan, nekenin sipat sétannya èn kecakepannya nyeng sekencering.^[6]

Cerita sétan salju jepang béda-béda saben pèrsinya. Dalem macem-macem cerita, sétan salju jepang nongol pas ada orang nyeng kejebak wayah badé salju, èn maké embusan napas nyeng atis bakal mbekuin dia pada ampé dia pada mampus. Laèn cerita bilang kalo dia pada bakal nyasarin orang-orang ampé kojor kedinginan. Di laèn cerita, dia mawjud sebagé wadon nyeng lagi gèndong bocah.^[3] Laèn cerita bilang kalo sétan salju jepang lebih kejem. Dalem tu cerita, dia nyerang rumah orang, ngedoberak pintu maké embusan angin bakal matiin orang nyeng lagi ngorog. Di atu cerita, dia kaya' pampir, nyerosot mokela dia punya korban, geragotin jakar lanang liwat hubungan badan atawa cipokan.^[3]

Kaya' salju èn usum salju, sétan salju jepang ada punya sisi baè'. Kadang-kadang, dia bagènin korbannya baé dengen beragem alesan. Dalem atu cerita, dia bagènin atu cowo' tetep idup lantaran kegantengan èn umurnya nyeng masing bocah. Dia ngeja perjanjian bakal si cowo' ga' nyeritain tempat di mana sétan salju jepangnya ada, cuman hatu ari, si cowo' malah nyeritain kalo dia panggihan ama sétan salju jepang ama bininya nyeng ga' taunya tuh jelmaan deri sétan salju jepang. Bininya langsung misuh-misuh ama lakinya lantaran jalir janji, cuma dia ngampunin lakinya punya nyawa sebab kelangsungan dia pada punya anak-anak punya lantaran (cuma kalo lakinya wanèn pisan nganiaya anaknya, sétan salju jepang gè' balik dateng èn ngabisin dia sonder petèntèng aling-aling. Alhamdulillahnya, lakinya tuh orang baè').^[6] Dalem laèn pèrsi, sétan salju jepang milih ga' matiin lantaran dia nganggep lakinya ga' jalir janji (sétan salju jepang laèn orang, mangkanya ga' keitung jalir janji).

Pèrsi Lafcadio Hearn

Sétan salju jepang dalèm Gazu Hyakki Yakō bikinan Toriyama Sekién.

Jaman baheula banget, ada dua tukang tebang kayu, Minokici èn Mosaku. Minokici masing anom melèngken Mosaku udah kolot. Hatu ati di usum dingin, dia pada kadanan balik abis nebang kayu lantaran kejebak badé salju. Dia pada nemuin atu pondok èn mantesin bakal ngèndong di situ. Tengah malem, Mosaku kebangun èn ngiat atu sosok wadon cakep nyeng pakéannya putih semuanya. Tu wadon ngembusin napasnya ke Mosaku ampé tu orang tua mati kedinginan. Abis matiin Mosaku, dia ndeketin Minokici bakal ngelakonin hal nyeng sama kaya' tadi, cuma dia ceming cekencering sembari ngiat Minokici punya roman. Dia bilang kalo dia bakal matiin Minokici, cuma dia mantesin bakal ga' matiin lantaran Minokici tuh ganteng èn masing muda bakal dimatiin. Tu wadon ngancem kalo-kalo Minokici sampé nyeritain tu kejadian ama orang-orang, mangka tu wadon bakal matiin dia.

Berapa taon abisannya, Minokici panggihan ama cèwè' cakep nyeng namanya Oyuki, terus pada kawinan dah tu bedua. Oyuki entu atu bini nyeng baè' èn dia pada idup bungah bareng serènta gablegin berapa anak. Dia pada idup sebagé kuarga nyeng bahagèa selama taonan, cuma anèhnya, Oyuki kaya' ga' tua-tua.

Hatu malem abis anak-anak pada pules, Minokici ngomong ama Oyuki kalo saben dia ngiat bininya keja bener, dia nginget atu kejadian anèh nyeng keberak pas lagi muda. Dia bilang kalo dia tau percis tuh sosok wadon nyeng cakep kaya' Oyuki. Dia teuing beneran tu cenjadi panggihan ama sétan salju jepang apa cuman mimpi doang.

Abis nyudain omongan, Oyuki nangtung dah tu sembari nesu-nesu. Dia ngaku kalo wadon nyeng dilongok ama Minokici tu ya dia. Dia gè' bilang kalo kalo dia bakal matiin Minokici kalo-kalo dia nyeritain tu cerita ama laèn orang. Pegimana gè', dia ga' bisa matiin Minokici lantaran ngitung-ngitung keidupan dia pada punya anak. Abis ngasih pesen ke Minokici bakal jagain anaknya, tu wadon cering ngilang. Entè' lagi nyeng ngelongok dia cenggableg masing apa kaga'.

Dalem budaya bekèn wayah gini

Sétan salju jepang nongol dalem pèlem, acara tipi, èn tulisan-tuisan, kaya' roman atawa gambar cèmèn. Cerita tu sétan salju jepang kaya':

Dalem Kwaidan, pèlem Nipong taon 1964 soal cerita-cerita sétan.
Dalem mNurarihyon no Mago, sétan salju jepang entu atu jenis jurig nyeng digero' deri daèrah Tono. Dua anggota Hyakki Yakou tu sétan salju jepang, nya'entu Yuki-onna Tsurara èn Yuki-onna Setsura.
Dalem pèlem cèmèn ""Bleach", ruh Zanpakuto nyeng namanya Sode no Shirayuki (pedangnya Rukia Kuciki) digambarin sebagé sétan salju jepang nyeng ada punya keboléan èsnya.
Dalem Rosario + Vampire, tokoh Mijoré Sirayuki tu sétan salju jepang nyeng mawjud jadi orang.
Pokémon nampilin Froslass, pokémon ès èn sétan nyeng ngilhamin sétan salju jepang.
Dalem Card Captor Sakura, Clow's Card Snow tu sétan salju jepang.
Dalem Gate Keepers, tokoh Yukino Houjou tuh ya sétan salju jepang.
Dalem Kanokon, tokoh Yukihana tuh ya sétan salju jepang.
Dalem Lum: The Invader Girl, tokoh Yukimé tuh ya sétan salju jepang nyeng jadi pacarnya tokoh utama.
Dalem Sphere of Power, tokoh utama wadon ampir mati beku lantaran serangannya sétan salju jepang.
Dalem gim Shinobi 3D, raja pertamanya entu ya sétan salju jepang.
Dalem Yu Yu Hakusho, Yukina deri Hiéi tuh ya sétan salju jepang.
Dalem Yume Nikki, sétan salju jepang bisa ditemuin di Snow World.
Dalem Yuki Onna, atu roman nyeng bolé dikarang Makiko Mori.^[7]

Catetan kaki

↑ ^a ^b ^c Konno 1981, ditukil ama Hirakawa, Sukehiro (平川祐弘) (1992), 小泉八雲: 回想と研究 (Koizumi Yakumo: kaisō to kenkyū) (snippet), Kodansha, h. 227, kutipan:"雪女の名称は雪娘、雪女郎、雪婆、雪降婆、シッケンケンなど.."
↑ ^a ^b ^c Furuhashi 1992
↑ ^a ^b ^c "Yuki-onna". Japanese1-2-3.com. Diarsipin deri nyang asli tanggal 2006-08-25. Dipungut 2012-04-28. {{cite web}}: Unknown parameter |dead-url= ignored (|url-status= suggested) (pertulungan)
↑ Seki, Seigo Seki (1963), Folktales of Japan, p. 81, University of Chicago, ISBN 0-226-74614-3
↑ Smith, Richard Gordon, "The Snow Ghost", Chapter XLIX of Ancient Tales and Folk-lore of Japan {{citation}}: Unknown parameter |site= ignored (pertulungan)
↑ ^a ^b "Kwaidan: Yuki-onna (Snow Woman)". Sarudama.com.
↑ Schierbeck, Sachiko Shibata; Edelstein, Marlene R. (1994). Japanese Women Novelists in the 20th Century: 104 Biographies, 1900-1993 (dalem basa Inggris). Museum Tusculanum Press. h. 190. ISBN 978-87-7289-268-9.{{cite book}}: CS1 maint: url-status (link)

Ruju'an

Furuhashi, Nobutaka (古橋信孝) (1992), "雪女伝説", di Isamu Yoshinari(吉成勇)ed. (prm.), Nihon 'Shinwa Densetsu' Sōran (日本「神話・伝説」総覧), 歴史読本特別増刊・事典シリーズ, Shinjinbutsu Orai sha (新人物往来社), h. 276–277, ISBN 978-4-4040-2011-6
Konno, Ensuke(今野円輔) (1981), 日本怪談集妖怪篇(Nihon kaidanshū yōkai hen), Gendai Kyoiku bunko, Shakai Shisho sha, h. 4-, ASIN B000J98U1S, ISBN 978-4-390-11055-6

Bacaan terusan

Meyer, Matthew (2015). The Night Parade of One Hundred Demons: A Field Guide to Japanese Yōkai. ISBN 9780985218423.{{cite book}}: CS1 maint: url-status (link)
Meyer, Matthew (2015). The Hour of Meeting Evil Spirits: An Encyclopedia of Mononoke and Magic. Brill. ISBN 9780985218430.{{cite book}}: CS1 maint: url-status (link)
Meyer, Matthew (2019). The Book of the Hakutaku: A Bestiary of Japanese Monsters. ISBN 9780985218454.{{cite book}}: CS1 maint: url-status (link)
Meyer, Matthew (2022). The Fox's Wedding: A Compendium of Japanese Folklore (Yokai Book 4). iUniverse. ISBN 0985218479.{{cite book}}: CS1 maint: url-status (link)

Sènggètan luar

The Obakemono Project: Yuki-onna
An article that references Yuki Onna in the movies Japanzine By Jon Wilks

[konno-1] Konno 1981, ditukil ama Hirakawa, Sukehiro (平川祐弘) (1992), 小泉八雲: 回想と研究 (Koizumi Yakumo: kaisō to kenkyū) (snippet), Kodansha, h. 227, kutipan:"雪女の名称は雪娘、雪女郎、雪婆、雪降婆、シッケンケンなど.."

[soran-2] Furuhashi 1992

[a-3] "Yuki-onna". Japanese1-2-3.com. Diarsipin deri nyang asli tanggal 2006-08-25. Dipungut 2012-04-28. {{cite web}}: Unknown parameter |dead-url= ignored (|url-status= suggested) (pertulungan)

[4] Seki, Seigo Seki (1963), Folktales of Japan, p. 81, University of Chicago, ISBN 0-226-74614-3

[5] Smith, Richard Gordon, "The Snow Ghost", Chapter XLIX of Ancient Tales and Folk-lore of Japan {{citation}}: Unknown parameter |site= ignored (pertulungan)

[b-6] "Kwaidan: Yuki-onna (Snow Woman)". Sarudama.com.

[7] Schierbeck, Sachiko Shibata; Edelstein, Marlene R. (1994). Japanese Women Novelists in the 20th Century: 104 Biographies, 1900-1993 (dalem basa Inggris). Museum Tusculanum Press. h. 190. ISBN 978-87-7289-268-9.{{cite book}}: CS1 maint: url-status (link)

[1]

[2]

[3]

[4]

[5]

[6]

[7]