Samsung
Samsung Group (hurup Hangel: 삼성; tuker hurup: Samsóng; ditulis jadi SɅMSUNG; hurup Arab Gundul: سامسوڠ) nya'entu kongsi banyak bangsa nyang sintremnya di Samsung Town, Soul, Koréa Kidul. Enni kongsi ada punya secuplek anak kongsi nyang kebanyakan ngambil asma Samsung èn enni kongsi tu kongsi konglomerat nomor wahid di Koréa Kidul.
Samsung diwangun ama Li Byóng Cól taon 1938 nyang juga jadi atu kongsi dagang. Dalem tiga pulu taonan buntutannya, enni kongsi menggar ke laèn ihwal, kaya' makanan, baju, asuransi, sekuritas, èn ècèran (ritèl). Terusannya, Samsung gè menggar ke pabrikan barang lèstrik di buntutan 1960-an, serènta ke pabrik pewangunan èn pengejaan kapal di tenga taon 1970-an. Enni tiga ihwal nyang jadi pancang enni kongsi punya penggaran. Abis peninggalnya Li taon 1987, Samsung dibelèk jadi apat kongsi usaha, nya'entu Samsung Group, Shinsegae Group, CJ Group, èn Hansol Group. Sempragan taon 1990, Samsung naèkin penjualan barangnya ke luar Koréa Kidul, utamanya barang pesawat hèngpon èn semikonduktor nyang taranannya jadi sumber pemasupan nyang pentingnya nomor wahid. Ampé taon 2020, Samsung ada punya tilai asma paling luhur kedelapan di dunia.
Anak usaha Samsung nyang paling mashur entu Samsung Electronics (kongsi tèknolohi ubung-ubungan, pengeja barang lèstrik, èn pengeja cip nyang pemasupannya paling gedé di dunia di taon 2017), Samsung Heavy Industries (pengeja kapal paling gedé kedua di dunia di taon 2010), èn Samsung Engineering, serènta Samsung C&T (hatu-hatu jadi kongsi pewangunan paling gedé ke-13 èn ke-36 di dunia). Anak usaha Samsung selaènnya entu Samsung Life Insurance (kongsi asuransi paling gedé ke-14 di dunia), Samsung Everland (penggawé Everland Resort, taman hiburan paling kolot di Koréa Kidul), èn Cheil Worldwide (pengemboh i'lan nyang pemasupannya paling gedé ke-15 di dunia di taon 2012).
Samsung ada punya aru-aruan nyang kuat pada bagéan pemenggaran atur banda, pulitik, média, èn budaya di Koréa Kidul, serènta jadi penyokong utama "Mu'jijat di kali Han". Anak usaha Samsung ngeja kisaran atu per lima deri jumblah èkspor Koréa Kidul. Pemasupan Samsung gè percis 17% PDB Koréa Kidul nyang gedénya ampé $1,082 terliun.
Sekabèhnya persidèn di trap C Samsung ada punya kuasa sonder wates. Ora hèran gènèngan kalo Samsung punya pegawé ngojog-ngojog dia-dia nyang jadi kongsi punya persiden entu kaya' "déwa".
Cuplek 20 persidèn nyang diojog bè kaya' "déwa" entu cuman 0,02% deri jumblah pegawé nyang gawé di Samsung. Dia pada entu juru kunci èn pengeja keputusan usaha. Ora hèran yèn dia pada ada punya waktu nyang tumbrahan di kantor èn ngutat-ngutat "kerajaan" deri bè bareng kulawarga di umah.