Sembayang lima waktu

Sembayang lima waktu (hurup Arab Gundul: صلاة ليم وقت; Arab: الصلوات الخمس al-ṣalawāt al-khams) entu sembayang nyang hukumnya pardu aèn èn dilakonin di waktu-waktu husus, seari lima kali. Sembayang lima waktu entu atu deri rukun Selam nyang lima. Allah nurunin perènta sembayang lima waktu pas peristiwa Isra' Mè'rad. Ni sembayang hukumnya pardu aèn, artinya kudu atawa wajib dilakonin ama saban sorang Selam nyang udah balèg, kecuali kalu ada alangan bahna sakit kedalon, haèd, èn sebagénya. Husus bakal sakit atawa cacat nyang ngewatesin umat dalem ngelakonin sembayang sepegimana kudunya, mangka dia pada bolé dah sembayang sembèn ngejogrog atawa nggabag sebisanya.

Nah, kalu Juma'at, lanang Selam kudu nglakonin nyang namanya sembayang Juma'at di mesigit jema'ahan sebagé gantinya sembayang Lohor. Sembayang Jum'at kaga' wajib bakal wadon atawa bakal sapa-sapa nyang lagi sapar.