Switserlan

Peréngkoan Switserlan Schweizerische Eidgenossenschaft (Dèt) Confédération suisse (Prasman) Confederazione Svizzera (Itali) Confederaziun svizra (Réto-Roman) Confoederatio helvetica (Latin)
Ibu negeri	Bèren
Nama pengendek	Swis Swit Switser

Switserlan (hurup Arab Gundul: سويتسرلند atawa اسويتسرلند; Dèt: Schweiz; Prasman: Suisse; Itali: Svizzera; Réto-Roman: Svizra) atawa sering disingket Swis (hurup Arab Gundul: سويس atawa اسويس) atawa Swit (hurup Arab Gundul: سويت atawa اسويت) atawa resminya Peréngkoan Switserlan (hurup Arab Gundul: فريڠکوان سويتسرلند atawa فريڠکوان اسويتسرلند; Dèt: Schweizerische Eidgenossenschaft; Prasman: Confédération suisse; Itali: Confederazione Svizzera; Réto-Roman: Confederaziun svizra) entu atu negara nyang kena dibilang kecit di Èropa Kulon. Nama resminya entu Confoederatio Helvetica, nyang dalem basa Latèn èn ora sering dipaké selaèn di mana-mana dokumèn resmi negara. Switserlan entu atu peréngkoan nyang kebentuk deri negeri-negeri nyang lebi kecil, ya'entu ada 26 kanton (negeri).

Switserlan mashur lantaran kenètralannya, ya'entu ora' nimbrung mana-mana pihak pas lagi ada perang. Switserlan uda nètral semprakan tahon 1815. Banyak paguyuban antérobangsa ada di Switserlan. Perserèkatan Bangsa-Bangsa juga' ada kantor utama (bukan sintremnya) di Jénéwa. Paguyuban pendulunya, Liga Bangsa-Bangsa, juga' disintremin di Jénéwa.

Ada empat basa resmi nyang ada di Switserlan, antara laèn: basa Dèt, basa Prasman, basa Itali, èn basa Réto-Roman. Ada beberapa kanton atawa malahan kota nyang ada dua basa sekaligus dipaké. Sebagé lagi, di kanton nyang paling luas, Grobenderlan, malah ada tiga basa. Sekitar 2/3 deri jumblah penduduk pada ngomong basa Dèt; basa Prasman dipaké di bekulonnya entu negara, èn basa Itali – di kanton Ticino, èn basa Réto-Roman di sebagèan bilangan Grobenderlan. Basa Réto-Roman cuman dipaké ama kurang deri 1% deri antéro penduduk.

Switserlan ora gableg hopstad resmi, cuman sering Bèren dijadiin kaya' sakan-akan dia punya hopstat. Adapun dia punya kota paling gedénya Sirih.

Di blèlirnya Switserlan ada Dètslan, di blètannya – Ostenrèk èn Lihtenstèn, di bekidulnya – Itali, èn di bekulonnya – Prasman.

Adapun orang Switserlan bisa digero' orang Swis (hurup Arab Gundul: اورڠ سويس) atawa orang Swit (hurup Arab Gundul: اورڠ سويت) atawa orang Switser (hurup Arab Gundul: اورڠ سويتسر).

Ruju'an

1. REDIRECT Templat:Negara di Èropa